काठमाडौँ, ९ जेठ । विश्वप्रख्यात आरोही कामीरिता शेर्पाले ३०औं पटक सगरमाथाको चुचुरोमा पाइला राख्न सफल भएका छन् । उनी बुधबार बिहान ७ बजेर ४९ मिनेटमा सगरमाथा चुचुरोमा पुगेका हुन् ।
आधारशिविरमा रहेको फोर्टिन पिक्स एक्सपिडिसनका संस्थापक सीईओ टासी लाक्पा शेर्पासँग वाकिटकीमा कुरा गर्दै कामीरिताले आफू ३०औं पटक चुचुरोमा पुग्न सफल भएको बताएका छन् । यो आरोहण सफल भएसँगै कामीरिता संसारकै सर्वाधिक अग्लो हिमचुचुरो सगरमाथामा सबैभन्दा धेरैपटक पुग्ने कीर्तिमानी आरोही भएका छन् ।
विक्रम संवत २०३९ (१२ वर्षको उमेर) देखि हिमाल आरोहण क्षेत्रमा काम गर्दै आएका सोलुखुम्बुको थामेका कामीरिताले पहिलो पटक २०५१ सालको वसन्तकालीन याममा सगरमाथा आरोहण गरेका थिए । यसअघि उनले ५ वर्ष एकै सिजनमा दुईपटक सगरमाथा आरोहण गरिसकेका छन् । एकै सिजनमा दुई पटकको आरोहणअन्तर्गत यो उनको छैंटौं आरोहण हो ।
कामीरिता शेर्पा सगरमाथामा रेकर्ड ब्रेक गर्ने होडमा नभई आफ्नो पेसा नै हिमाल आरोहणसँग जोडिएकाले ‘चढ्दा चढ्दै रेकर्ड’ कायम हुन गएको बताउँछन् । सगरमाथासहित अरु ८ हजार अग्ला हिमालमा उनी ४४ पटक पुगिसकेका छन् ।
