कृष्ण मण्डल
फत्तेपुर(सप्तरी), २८ चैत । स्थापनाकाे ५० वर्ष पूरा भएकाे अवसरमा सप्तरीको फत्तेपुरस्थित त्रियुगा बहुमुखी सहकारी संस्थाले आज बुधबार स्वर्ण जयन्ती मनाएकाे छ ।
सप्तकोसी नगरपालिकाकाे फत्तेपुरस्थित शहित स्मृति रंगशालामा आयाेजना गरिएको उक्त स्वर्ण जयन्तीमा लाेपन्मुख पञ्चेबाजा, किराँत नाच, नेवा, मगर, थारु नाँच-झाँकी प्रस्तुत गरियो ।
सहकारीका अध्यक्ष चन्देश्वर चाैधरीकाे अध्यक्षतामा सम्पन्न कार्यक्रममा राष्ट्रिय सहकारी महासंघका अध्यक्ष ओमदेवी मल्लले ५० वर्षदेखि आफ्नो गरिमा कायम राख्न सफल भएका त्रियुगा सहकारीकाे नक्कल गर्न मुलुकका अन्य सहकारी सञ्चालकहरुलाई सुझाव दिईन् । 
झण्डै ४ हजार ४० सेयर सदस्य रहेकाे त्रियुगा सहकारीले हालसम्म ४४ कराेड ५३ लाख ७५ हजार रुपैयाँ ऋण लगानी गरेकाे छ भने हालसम्म ४५ कराेड ९८ लाख २६ हजार बचत गरेकाे सहकारीका सल्लाहकार समितिका अध्यक्ष खगेन्द्र कार्कीले जानकारी दिए । उक्त सहकारीको ५ कराेड ११ लाख ३४ हजार कुल शेयर पुँजी रहेको छ ।
कार्यक्रममा सहकारीका पुर्वअध्यक्षहरु, वृद्ध सेयर सदस्यसहितकालाई सम्मान गरिएको थियो ।
