जनकपुरधाम, असार १० । छ महिनाअघि चर्चित कलाकार अविनाश झा ‘कलकतियाबाली’ सँग अन्तरजातीय विवाह गरेकी अंशा सदा जनकपुरमा मृत अवस्थामा फेला परेकी छिन् ।
जनकपुरधाम उपमहानगरपालिका–१२ र २० को सीमामा पर्ने नोचापुरस्थित पतिको घरमै सोमबार राति उनी मृत फेला परेको जनाइएको छ । घटनाले पुरै क्षेत्रलाई स्तब्ध बनाएको छ ।
अंशा सदा र अविनाश झा बीचको विवाह गत वर्ष सामाजिक सञ्जालमा निकै चर्चित बनेको थियो । अंशा दलित समुदायकी थिइन् भने अविनाश झा मधेसी सहरिया समुदायका लोकप्रिय कलाकार हुन् । उनीहरूले जातीय र सामाजिक भेदभाव तोडेर विवाह गरेका थिए, जसलाई धेरैले साहसी कदमका रूपमा स्वागत गरेका थिए।
घटनाबारे प्रहरीले अनुसन्धान सुरु गरेको छ । जिल्ला प्रहरी कार्यालय धनुषाका अनुसार अंशाको शव पोस्टमार्टमका लागि प्रादेशिक अस्पताल जनकपुर पठाइएको छ र मृत्युको कारण खुल्न बाँकी छ ।
हालसम्म घटनालाई संदेहास्पद मानिएको छ र विभिन्न कोणबाट अनुसन्धान भइरहेको प्रहरीले जनाएको छ । परिवार र आफन्तबाट बयान लिने प्रक्रिया चलिरहेको बताइएको छ ।
घटनापछि सामाजिक सञ्जालमा शोक र आक्रोश दुबै देखिएको छ । अंशा सदाकी साथीहरूले सामाजिक दबाब र मानसिक पीडाले उनी तनावमा रहेको हुनसक्ने आशंका व्यक्त गरेका छन्, यद्यपि यसको औपचारिक पुष्टि भइनसकेको प्रहरीले स्पष्ट पारेको छ।
